gikan na si bobby didtong lugara

gikan na si bobby didtong lugara puros mga bongbong, mga pader, mga kisame, mga sementadong salog bugnaw, nagbasa, kiwa, langto, gipanglumotan nga mga kilid, walay tawo, walay kisaw, ang kahilom og kahaw-ang og ang imong isulti dili gani masumbalik kanimo,

walay mga bagtok, wala gani bisan usa ka ok-ok, madungog ang paglupad sa duha ka lamok

adlawan ni bobby, walay ipalitsa usa ka lechon nga manok, apan dili gihapon papiri, nakasalikwit og usa ka pan monay sa Pilipino bakery,

og usa ka balayan sa posporo kadtong dunay hulagway ni dr. jose rizal,

16 na siya adtong marso 2, 1980, sa baratohon nga kwarto, estudyante,

usa ka pan monay, gitusokan og tulo ka posporo, gidagkotan og dayon mikanta

og happy birthday to me, happy birthday to me!

nag-drawing siya sa usa ka dako kaayong balay,
morag pader ang mga bongbong,
adunay kahayag nga misul-ip sa ibabaw
sa usa ka pula nga lingkoranan,

walay naglingkod didto, walay gusto molingkod nianang pula nga klase nga kaligotgot og kamingaw.