paghinumdum sa kalipay

monyeka ni betty balod kaayog pilok
iyang gipatulog sa iyang mga kamot

pusilpusil ni rico iyang gikablitkablit
sa iyang mga tudlo nagpataypatay

sa imong unang adlawan
usa ka karton nga pasalubong ni mama
gikan sa amerika

ang pagkatkat sa punoan sa bayabas
nga naglimutak sa mga hinog niyang mga bunga

ang inyong pagpangaligo sa suba
kuyog sa mga kabaw tibook adlaw
nagtampisaw
nagpauga sa silong sa adlaw
ibabaw sa dako kaayong bato

ang imong unang gugma
sa iyang unang halok sa imong aping
sa pagtagbo sa inyong mga ngabil
sa pagdap-ig sa iyang pus-on
diha sa imong pus-on
didto sa kamalig

ang imong unang gabii sa kaminyoon
ang imong wala pagkatulog
ang imong pagkiyodkiyod
sa kahomok sa unod sa kinabuhi

ang paglabay sa panahon
ang ambak sa kalipay
sa dihang nagmadaugon ka
sa imong mga pangandoy

ang tam-is nga dugos sa kinabuhi
imong gitilapan og
nahilis diha sa imong dila
nagpuyo diha sa imong baba
mitapot sa imong alingagngag

karon nangunot na ang imong mga orasan
nagabok na ang ilang mga tudlo
nabali na ang ilang mga kamot
gibokbok na ang imong lawas
nangatangtang ang imong mga ngipon
nangluag ang imong panit
mikarag na ang imong mga bukog
morag pabitay diha sa imong pultahan
nga gustong mahulog sa imong hagdanan


og ang imong gibati mao ang paglunos
pagpanghushos pagpanghios sa imong kinabuhi

ang tigulang nga dili na makalakaw
naghigda sa katre nakigsandurot sa kisame
nakigsulti sa iyang katre og mga lamesa og mga silya

ang iyang kamingaw nagsiging handom
sa iyang mga kalipay nga mibalik kaniya,
gihagkan siya og dayon nanamilit,
nanglabay lamang.