seriously speaking

kon mopalayo na gani kita sa komedya
og bugalbugal, moingon ta, morag warning

seriously speaking

og atong sumpayan sa atong gusto nga buot ipasabot,
kabahin sa mga butang nga dili na nato
katiawtiawan kay basin og adunay moboto o
dili ba adunay mabungkag
og mamatay

sa atong pag-chat, kanang walay camera
pwede nga diha lamang kita sa mga mabaw nga tubig
kanang tagakiting
kanang dili mabasa ang atong mga sampot

sa unang hapnig, sa atong panagsulti,
mamahimong ipakita lang nako ang mantil nga adunay
mga borda sa mga bulak og mga dahon
tabonan sa nato ang lamesa
nga bogion

enjoy ka, enjoy ko,
mao kana ang unang hapnig
wala pa ang mga kamatooran dinha
dili tungod kay mamakak tang duha
anaa lang ang panagsabot nga wala pa diha ang pagpanit
sa camoteng kahoy
gitan-aw lang sa nato
dili pa gani hugasan ang mga lapok
nga mitapot sa iyang lawas

seguro sa kadugayan andam na kita
sa ikaduhang hapnig wala pa nang

seriously speaking

asa ka nagtrabaho? minyo ka na ba?
pila na diay ang imong edad?
bulag ka sa imong bana?
naa moy anak?

walay problema, statement of facts lang
wala pa ang mga deductions,
kon unsa ang mga hinungdan ?
ngano?

dugay pa ang panahon,
patuboon pa nato ang usa ka liso sa nangka,
mangudlot pa, motubo,
basin kon mag-edad na kini og usa ka tuig

ayha pa kita mopaingon anang

seriously speaking,

nga mao kini mao kadto ang nahitabo

que este que por aqui
onde man to anda?

hangod
nga ikaw miabot anang gitawag og

shaking experience

diin gilinog pag-ayo ang imong pagkatawo,
natay-og ka pag-ayo og
gani miingon ka nga gusto mo nang mamatay
nga dili ka na ganahan pang mabuhi
kay wala nay igong katarungan
nganong mabuhi pa
nining bugno sa kalibotan

gihatag ko ang akong kamot,
bisan gani dili nimo dawaton
mihawa ako sa akong panahon,
bisan dili nimo kinahanglan
gikalimtan ko ang akong mga labad,
aron lang tagaan og tambal ang imong mga labad,
bisan wala ka mangayo niini

wala na ko motingog
dili ko na gani malitok kanang

seriously speaking

mitapad lang ako kanimo,
naghawid sa akong panyo og
akong gisalod ang imong mga luha
misurop sa 100% cotton
milakra ang imong nawong og
akong gidala sa amo
akong gipatong sa akong dughan,
og ako naghunahuna nga maghimo og
mga balak alang kanimo

seriously speaking,

wala kita maghandom nga kitang duha ang magkadayon
lahi ang imong balay, magkalahi ang atong dalan
lahi ang imong labad, og ang akong labad,
ako lang usab kana

seriously speaking........