ang kamada ni amada

sa mahjongan lahi ang kamada ni amada
pung, daog na sab siya.

ang unang kamada mao ang mga dagat, kakahoyan
kapatagan, kabukiran, diha siya nimo makit-an nga nagpuyo
nga malinawon, malipayon
sa iyang mga buhok anaa ang mga bulak og mga alibangbang
og sa iyang mata anaa ang bulan og mga bitoon
sa iyang mga kamot anaa ang mga kuyamoy sa kahayag sa adlaw
og sa iyang mga tiil iyang gitumban ang kalibotan

ang ikaduhang kamada mao ang mga kabatoan og ang mga
migahi nga tig-a kaayo nga mga lapok, sagol ang mga balas
og ang kahilom nga morag mga kalabira didto sa sementeryo

ang ikatulong kamada mao ang tubig sa ilalom sa yuta
ang mga tinagoang kabasa, ang mga suba, ang mga sapa
nga nasirad-an na sa kadugay sa panahon

ang ikaupat nga kamada, og lalom lalom na gayod kini
mao ang pagkawala sa mga gininhawa, ang mga nalubong
mga mga pangpang, og mga disyerto, ang mga pulos bato

ang ikalima nga kamada, mao ang mga bato nga nahilis sa
init kaayo nga kalayo, ang mugmog sa impyerno, og bisan
wala pay nakaadto didto nga tawo, aduna nay mga pasiuna
nga kahibalo nga gipatik sa atong mga galamhan, gibati kini.

og busa, tan-awa ang unang kamada, anaa si amada,
nagpabulhot sa iyang sigarilyo sulod sa madyongan,
gihaploy ang mga petsas, gitagna ang iyang kadaogan

apan sud sa iyang dughan, anaa ang ikalimang kamada,
nalisang siya niini kay moabot ra siya didto, apan nganong
ambaton mga kini niya. Anaa pa siya sa unang kamada,

para kaniya, pahimuslan kini samtang wala pa moabot
ang paglimugmog unya sa ikalimang hugna sa iyang kinabuhi.