ikaw nga angayang maglipay

adunay gitagoan ang mga katarungan
nganong dunay nakita sa atong mga mata
og dayon hukman sa atong baba nga dili
na lang isulti, og ang atong agtang mosinaw
og dayon og yango nga kini sakto ra

sa kahinog sa panahon ang mga takna
maghiusa sa mga nanglabay nga kahinam
makigsandurot ang mga kamot og
magaksanay ang mga bukton og
ang mga dughan mangabre aron
paluparon ang mga kalanggaman
nga dugay nang nag-antos sa mga hawla
sa atong mga kaikag

ablihon sa hangin ang pultahan sa
kalipay og mangalimyon ang kahumot
sa mga pagbati sa mga kabulakan

diha ka sa tunga, imo ang adlaw.