ang pag-ila-ilahay

gusto nimong mailaila ang iyang pagkasiya
imong gipatantang ang iyang sapot
ang iyang bra
ang iyang panty
nakita mo na ang tanan

nahuwasan ka na ba kon kinsa siya?
wala pa.

unsa ba ang sunod nimong ipatangtang?
ang iyang panit?
ang iyang unod?
ang iyang mga ugat?
ang iyang mga bukog?
nailaila mo na ba siya?

ang nabilin bahin kaniya
mao na lamang ang iyang kalag

unsa pa ang imong gustong ipatangtang
aron gayod nimo siya mailaila?

walay panit, unod, bukog, ugat, ang iyang kalag
sayod ka niana

nailhan mo na ba siya?
wala pa.

sultihi ko kon unsa pa ba ang angay tangtangon
karon nga wala nay matangtang pa kaniya?

nailhan mo na ba siya?
wala pa gihapon.

walay tawo nga makaila sa tawo.
wala.

panahon na nga atong ipasout balik kaniya
ang iyang mga bukog, unod, ugat, panit ang iyang panty, bra,
ang iyang sapot

atong dawaton ang iyang pagkatawo bisan wala kita makaila kaniya

kay sa pagkatinood
walay tawo nga makaila sa tawo

walay tawo nga makaila sa hingpit sa iyang isigkatawo.

wala.

gihuboan mo na siya. gitugnaw siya pag-ayo
wala ka ba malooy kaniya?