sulod sa baba ni linda

sulod sa baba ni linda ang iyang dila
ang iyang puti nga mga ngipon
ang iyang alingagngag

sa kaadlawon nagdamgo siya
og dako kaayong ulod misulod sa iyang baba
kay abre kini samtang naghagok siya
sa tumang kakapoy

mikalit og sira ang iyang baba
og milihok ang iyang dila
nakigdula sa ulod nga medyo
danlog

mipauraray ang ulod sa kilid sa
iyang alingagngag
sa una medyo gigil-asan si linda
gusto niyang iluwa
apan sa paglabay sa iyang
katulugon
medyo iyang nagustuhan ang
dula sa iyang dila og sa maong
ulod

iyang gitulon ang maong ulod
lapos sa iyang tilaok
mipuyo kini sud sa iyang dughan
sud sa iyang kasingkasing

gisirado na ni linda ang iyang
baba og sud sa tibook adlaw
nagdamgo ang iyang dila
og alho nga nahimong
dako kaayong kahoy
diin siya mikapyot og
nagambak-ambak sa tumang
kalipay

namati si linda sa iyang palibot
namalandong
sa nahitabo kaniya kaganihang kaadlawon

misanop ang pangalan ni samuel
ang iyang hinigugma nga bodegero
nga dagkog abaga og mga bukton

dagko ang iyang mga tiil og
lapad kaayo ang iyang dughan
bunguton ang iyang ngabil
og init kaayo ang iyang
dila

adunay miung-ong sa iyang baba
gusto niyang isulti
apan dili niya mayubit

lami, nindot, og hangtod sa iyang
ikamatay dili gayod kini
niya ikapanangpit sa iyang
mga silingan.

sa tibook adlaw si linda
nagkanta-kanta, nanaghoy,
misayaw sa huni sa
iyang kinabuhi.

dili ko na isulti kanimo nga siya
hingpit nga nagmalipayon.