si godofredo

ang iyang panglantaw sa kinabuhi
gihisama niya sa usa ka geometriko
tanan duna'y porma og ang tanan
nakalatid sa usa ka numero,

busa ang ulo, lingin,
ang mga kamot og tiil mga tobo,
ang mga tudlo tobo gihapon apan gagmay lang,

og ang uban iyang gipanganlan
nga mga parabola, rektanggol, kwadrado,
sinug-ang, og dayon niyag sukod niini,

og iyang gisuma total, og mibungat
nga mao kana ako,
ang tanang tawo,
pareho lamang mga porma
nga gitapad-tapad og
gipatong-patong nga de numero.

adunay higayon nga gisuntok og gisagpa
og gidabodabohan siya sa kapalaran,
og nawingig ang iyang nawong,
nabali ang iyang tiil og mga kamot,
og nangalagpot ang iyang mga ngipon,
og napudpod ang iyang utok
sa tumang kagool
og paghunahuna kon unsaon niya
pag-atubang og sulbad
ang mga suliran sa iyang kinabuhi,

gani akong idugang nga nagusbat
gayod ang iyang dughan
og midugo ang iyang kasing-kasing
sa tumang kasakit og pangabubho.

nawala ang iyang pakighinabi sa mga kwadrado
og mga lingin og mga parabola.
Ang iyang nakita mao lamang ang mga buhok
nga kalkag nga nahisama
sa mga tagkos nga nagkabohol-bohol,

nga lastiko nga wala masakto pagsapid,
nga pisi nga nagsalapid og gani
dili na siya kamao pang mohubad
kon unsaon nga kini mauli
sa ilang kaugalingong kahapsay.

didto niya nakita ang laing
mga porma sa mga pagbati.
Og nakaingon siya nga dili diay lalim,
dili diay niana
porma sa iyang kinabuhi.

Daghan kaayong gubot nga dili matugkad
og matukib.
morag matematiko diin
ang mga bag-ong problema mitungaw
apan sa iyang katingala,
iyang natugkad nga kini wala pay mga solusyon.

nanghubag ang iyang mga mata.
mitutok siya sa adlaw og sama sa uban
sa iyang pagpiyong ang iyang nakita
dili kangitngit kon dili ang kapula sa sud,
morag dugo nga mibanaw
sa hawanan sa iyang kalimutaw.