nahikatulog na ang mga kasakit og kahiubos
diha sa imong mga kagahapon
natabonan na sa mga puting balas
didto sa baybayon
karon ania ka isip usa ka balod
abtik nga miabot, ligsi og gustong
moligidligid nga morag habol nga giyabyab
ni nanay sa sayo sa kabuntagon
sa dihang kita nangmata og sayo
kay aron unta maligo didto sa atabay
nagkisikisi ka og ako mitutok kanimo
mora ka og nasuko nganong tutukan
dili ka gustong tan-awon sa imong gibuhat
gusto mong ungkaton ang tanan
gusto mong wiwion ang mga ulat
mora bag dili ka na mahadlok sa dugo
gihawiran ko ang imong mga kamot
og ako kang gigakos sa imong pagkamanghod
sa imong pagkalinghod pagkakaron
gitaral ka nako sa pultahan og ako kang
gipatan-aw sa atong iro nga nindot kaayo
ang iyang katulog diha sa daplin sa pultahan
nahigmata kini og dayon og kitiw sa iyang ikog
salamat kay nasabtan mo ako. Tala na
dalha ang kabo og sabon kay mangaligo na kita.
dia nako ang atong mga tualya.Ako ang magtimba.
No comments:
Post a Comment