ambot lang

adunay panahon nga kita lutoson,
nga morag gibagyo ang atong balay
og ang tanan nangapalid,
ang mga haligi nangapuklid,
ang alimpolos mitangag sa mga butang
nga atong gihimong bililhon og
ang tanang nawagtang daw
sama sa mga abog diha sa imong lamesa
og lingkoranan
morag kadyot lang nga gitrapohan og
nalimpyo nahawan nahanaw

sa imong tumang kagool morag kag nawad-an
og panimoot og sa dihang ikaw pangutan-on
kon unsa ba ang tinood nga nahitabo
ikaw sa dayon moingon og
ambot lang.

wala kay kasayuran kay kalit lamang
ang mga panghitabo
morag barko nga nalunod,
og ang imong nadungog mao lamang
ang mga syagit sa mga bata
nga kalit ra usab nga nawala
nga morag gitulon sa usa ka dako
kaayong baba sa dagat. ambot lang.

wala kay kasayoran. apan dako kaayo
ang lakra sa imong bun-og
diha sa imong aping og mga bukton.

ambot lang mao kanay imong siging
giingon kanako apan imong gibati ang
kabothonon nimong dughan

adunay miboto. nakita mo ang pagsiplit sa dugo.
apan wala ka na nagpakabana niini.
kay unsa pa ba ang imong mahimo

kon ang iyang giingon mao na lamang
ang unom ka bulan
nga gani pwede pa kining mas mukopos pa
sa upat
o tulo.

nawingig ang imong nawong.
dili ka katutok kaniya tungod
kay daghang buhobuho
ang resulta sa iyang MRI,
og nanirado gali dayon ang doktor
sa pulatahn sa pag-ingon niya diha kanimo
sa kamatooran.

Apan dili siya bogo og bungol.
Siya nakasabot og nakadungog.
Karon kamong duha
nagtinan-away og
miingon ka
ambot lang. wala kay kasayoran.

midagan ka sa CR sa Medical Arts
og didto sa sulod mitulo ang imong mga luha
og gusto ka unta nga mosyagit kon ngano,

ngano ba!
dili kana pangutana.
syagit kana.
mibalik ka og nagpanglingo-lingo
kay dili ka gihapon
makatoo og miingon ka sa imong mga anak:

ambot ba, wala ako kasayod.

karon nakaamgo ka nga sa
atong kinabuhi bisan og nasayod kita
sa mga tubag sa pangutana
adunay moabot nga panahon
nga kita moingon:

ambot, ambot, wala gayod ako masayod niana.