kabahin kanimo

misulod ka sa pultahan sa among karaan kaayong balay
ang mga abog lamang ang namuyo didto nga malinawon

mibuka ang imong mga mata mitutok ka sa unahan
diin gitukod ko ang among bag-ong balay
diin namuyo didto ang among mga pangandoy
sa mga umaabot nga mga alibangbang

atua ako sa bag-ong balay namubo sa among mga bulak
gitawag ka nako
mibalibad ka
gihanyag ko ang akong mga saad nga ikaw og ako mamahimong
usa lamang
mibalibad ka
nanampiling atubang kanako

sa atong tunga
lagyo baya kita pag-ayo morag adunay dakong suba nga miagi
og gilitok ko ang imong ngalan sa mga isda nga nanglabay

gihangyo ko ikaw nga moduol kanako
og hawiran ko unta ang imong mga kamot
og haployon ang imong dughan
og mga buhok

mibalibad ka (bisan sa tinood gusto nimo unta ang atong panagtagbo)

nanglupad ang mga alindanaw nga morag mga piraw ang ilang mga pako
adunay miabot nga dakong baha
naanod ang mga dagkong isda

wala na sila nagpaabot nga makita nato
ang mga bulok sa ilang mga himbis
miabot ang dakong gabon
dunay gitabonan: ikaw

ang kalit nga nawagtang sa akong atubangan.