dili lang diay ako ang nag-inusara dinhing dapita

sa akong pag-inusara
daghan ang migitib nga mga gamot
sa akong kasubo

miabot ako sa tumoy sa akong
pagpunay og timbang-timbang
nga ang kalibotan
usa ka dako kaayo nga lingin
sa kasub-anan

hangtod nga nasihag ko ang usa
ka anino diha sa kangitngit
tupad sa nipis nga kahayag
nagtindog nga nagtan-aw
usab kanako

wala kami tingog
walay migawas nga paghimamat
sa among mga tilaok

ambot og naninghawak ba siya
o nagpatihulog lang ba ang
iyang mga bukton sa kilid
sa iyang dughan

hadlok kaha siya nga mawala
busa gihawiran niya ang
iyang lawas
sa iyang mga kamot?

og ako hadlok ba usab nga
makighimamat kaniya
kay basin og ako masakitan
na usab niining akong
pag-inusara?

pagkabugnaw sa hangin sa dagat
pagkalapad sa baybayon
pagkalalom sa kangitngit
pagkapino sa mga balas
nga akong gitumban
sa akong tiilan

mibiya ako nga wala kami
magkailhanay
walay kapuslanan kon ang
mga anino lamang
ang magtagbo sa daplin
sa baybayon

dili kamaong moisa sa ilang mga
kamot
dili kamaong mohawid og mohapuhap
sa usa ka lawas
nga nangita unta og kainit
sa lalom nga kaadlawon