mY secreT ponD

daghan ang moingon nga kon imong
mabasa ang kinabuhi sa nagsulat
makasabot ka na usab sa iyang gisulat

dali na dayong sabton ang iyang
mga pasumbingay, ang iyang mga
metaphors ang iyang gipili nga mga images

og moingan ka nga sumala sa
iyang kinabuhi, mao kana ang
buot ipasabot sa iyang mga balak

ang akong mga alibangbang
imo na dayong maila pinaagi
sa kolor sa akong panit

ang akong mga panganod imong
mailaila diha sa akong mga kaagi
sa akong mga gininhawa maila
nimo ang akong mga hangin

ang akong mga sapa dali ra nimong
mahimuagngay pinaagi sa akong
mga luha og ang akong mga bukid
mao ang ang akong mga pag-antos
og ang akong adlaw mao ang akong
kalipay og ang akong bulan mao
ang akong pag-inusara


ang tanan, imong itandi sa akong
kinabuhi, sumala sa akong gipadayag
kanimo
imong giilaila ang akong mga buhok
imong gihikap ang akong mga kamot
ang akong mga ngabil
akong pusod akong lapalapa
akong duha ka paa
akong mga tudlo
akong singsing sa kaminyoon

kon dunay wala makaila kanako
moingon ka dayon

"ako na siyang amigo, og ako ang
angay nga mosulti kaninyo sa
tinood nga kahulugan sa iyang
mga gipanulat"

moisa ka sa imong kamot
nga nanghambog sa daghang tubag
sa ilang mga pangutana

"ang iyang balak mao ang iyang
kinabuhi og ang iyang kinabuhi
mao ang iyang balak"

mibalak ka usab.

daghan ang motoo kanimo
apil na ang akong mga kaaway

apan pasayloa ako
nga ingnon ko ikaw nga
nianang puntoha
nasayop ka.


ang akong mga balak
akong kalag.

ang akong kalag
dili ang akong lawas

dili ang akong mga tiil
dili ang akong mga kamot
dili ang akong mga mata.

ang akong kalag ray
nasayod kon kinsa ko
kon unsa ang tinood
nga kamatooran sa akong
mga balak

kay ang nagsugid sa akong
mga balak ang akong
kalag lamang

og ang nagsugid sa akong
kalag kon unsa ang
isulat sa akong mga kamot

Diyos lamang ang nasayod.