ang telon sa entablado

ang imong mga bakak nahisama sa usa ka telon
sa entablado
tigtabon samtang dili pa kaya, samtang dili pa andam
ang sayaw sa imong kinabuhi

diha sa likod, anaa ang imong mga ihap sa imong lakang
usa, duha, tulo, kiay, lihay, upat, lima, unom, hunong,
biyo, tindog, luhod, kiay na usab, lakat sa hinayhinay

diha sa likod, mamahimong masayop ka kay dili pa ang
oras nga ikaw magpakita sa tinood

pag-abot sa oras, ablihan na ang telon og ang mga
nanan-aw natikig sa pagpaabot
ilang itisar ang ilang mga likod og dili palihokon ang ilang mga ulo
og ang ilang dunggan ila gayong abrihan nga morag nigo

mamati sila, motan-aw kanimo sa sayaw nimo sa imong kinabuhi
kon masayop ka, kalooy ba, masawayan ka gayod, og ikaw ang
hisgotan sa tibook adlaw

pagkahuman, sirad-an na usab ang entablado
motabon ang telon

ipakita ang dako kaayong kayab sa imong mga bakak
aron malingaw ang mga tawo, ang mga huwes, ang mga doktor, ang mga pilosopo
ang mga kritiko

palongon ang mga suga, adunay gamay nga musiko
para sa entrada nimo

magsugod na ta, moingon ang halangdon nga tigpaila
pasigaon ang suga sa entablado
ipatukar ang musika sa imong bag-ong sayaw

mosayaw ka, mopahiyom ka, moambak, mobalikog
bisan sa sulod sa imong dughan ikaw nag-iyak

wala na ang telon nga motabon sa imong mga luha
anaa ang tumang kahayag og ang imong kasubo sa imong kinabuhi
dili na nila makita.

ang imong mga bakak, sa tinood lang, ako usab kanang mga bakak.
diha kita nabuhi, diha kita naila, diha kita molungtad