miabot ang panahon sa usa ka piano
nga gusto na niyang mamahimong balyena
tungod sa iyang gibati nga kalaay sa tunga sa entablado
diin siya ang punay nga gipamati
og siya ang hinungdan sa pagkatawo sa mga pakpak
gusto niya ang lalom sa kahilom
didto sa lawod
didto sa kinailawman sa halayo kaayo nga dagat
nagpatabang siya sa hangin og busa giinat siya paingon sa langit
aron siya makalupad dayon og
tugpa didto sa tunga sa lawod sa kahilom
ang iyang mga tudlo nahimong mga ngipon nga kon imong tan-awon pag-ayo o tututkan sa dugay
aduna na siya'y mga tinagoan nga mga pangag
kay wala diay siyay kalipay
mibaga og milaapd ang iyang kapa og ang iyang tabon mikayab
iyang giyabyab ang mga kahigwaos
iyang gitikwang ang iyang pagkaaron-ingnon
og ang iyang tiyan mibukad og nahimong ulo
miinat ang iyang kilid og kini nahimong tiil og
sa kadugayan nahimong kapay
bisan unsaon siya paghawid sa iyang mga hikot
siya nakaipsot og tuod man nahimo siyang dako kaayong balyena
nga karon nagpunay og taghoy sa iyang kalipay didto sa kinailawman
sa dagat diin gipangita niya
ang kahalangdon sa hingpit nga kahilom
nga dugay na niyang gipanamkon
sa likod sa entablado sa mga dungganon
No comments:
Post a Comment