alang kang papa kon hain ka na

og karon mga higala mga igsoon mga paryente
ania na siya dinhi sulod niining lawak nga dili na maabri
pagatabonan siya sa mga yuta gikan sa atong mga kamot

kinsa kadtong dunay kasakit kaniya
kadtong dunay mga kahiubos
kadtong kanhi iyang nadagmalan sa
sa buhat

ania ako nagtindog sa inyong atubangan
nangayo og pasaylo

ugma magsugod na ang iyang pag-inusara
wala na siyay ikasulti og
kitang tanan mobiya kaniya dinhi
monamilit kita og ang uban gani magpabilin man
sa ilang mga bakho og luha og mga gitagong mga sugilanon
nga dili nila masulti kang bisan kinsa

atong biyaan ang iyang mga bukog
tapot ang iyang mga kahuyang og mga pagkulang
apan ato usab handomon ang iyang mga kaayo
og kamanggihatagon

kadtong nakadala og binukag nga mga boongon
og mga pungpong sa bulahan
kadtong natagaan niya og mga hungot nga puno sa bahaw
kadtong nabahinan niya sa iyang kusahos nga baka
kadtong natagaan niya sa mga tiil og panit sa kabaw
sa pipila na usab ka mga pista nga nanglabay

sa nahauna mangayo ako og pasaylo
og sa akong nahisgutan sa ulahi
nabatian ko ang kainit sa mga pasalamat.

karong mopanaw na siya sa halayong dapit
nga wala pa nato maadto o masinati
siya ato nang biyaan
atong mabati nga sama kaniya
adunay mga panahon nga kitang tanan
sa susamang mga panghitabo
og susama kaniya
kita napasagdan.

dinhi na lamang ako og daghang salamat
sa inyong pagduyog og pagtambong.