ang alas kwatro sa kaadlawon
sa daplin sa baybayon
nindot nga talan-awon
asul nga mga balod
nga morag gilikitlikit sa sa mga tudlo
sa kangitngit
mga aninipot nga nagpahuway
ang mga kahayag gikan sa duha ka baroto
nga kagabii nagdungan og dunggo
sa lapa-lapa sa dagat gustong motupad
sa mga lubi nga nagpahipi og nangahirig
naglakaw ko nga hinay
namati sa hunghong sa hangin
nga namugnaw sa kadagatan
pagkaanindot gayod!
sa asul og itom
kon silang duha magpunay og hagwa-hagwa
nga morag mga uyab
nga dugay na nga wala nagkita
nga og magawsan na sa ilang mga gibati
mokiblat ang mga ginagmayng kahayag
diha sa namahulay
nga mga gagmay og dagko nga mga baroto
kon motingog lang gayod unta
ang mga malipayong panghitabo
diha sa sulod sa mga lawak sa kaadlawon
seguro makaamgo ka
nga ang kalibotan
sa tinood lang
wala baya nagmasulob-on
No comments:
Post a Comment