kanus-a pa kaha

karon dili lang kahayag ang
akong gikinanhanglan

dili kaayo lisod pangitaon
ang kahayag
kay bisan ug sa siradong
lawak
maaninag pa man gihapon
ang kahayag
sama diha sa buslot nga
bongbong
ug pati na gani sa buslot
nga atop
ning atong gipuy-an

mas galisod ako ug pangita
sa kainit

kadtong kainit sa imong dughan
sa imong paa
sa imog bukton
sa imong halok

gihandom ko gihapon kini
diha sa pag-iyagak
sa uway nga katre

dugay na kaayo kadto
panumduman na lang
pagkahuman diha sa paghandom
naghatag kadto kanako ug
daghang kasakit
lalom kaayong kamingaw
nga mikulitog sa akong
kasingkasing

mahimong makalimtan
mahimo man
apan lami gayod gihapong
balik-balikan

kanus-a pa kaha? kanus-a
pa kaha?