mY secreT ponD

hapit mo na sugdan pagsulat ang walay kamatayon nga balak
sa dihang nanawag ang imong
tighagwa diha sa
selpon
nga nagpahimangno kanimo kabahin sa inyong panihapon didto's
cafe isabel
kon unsa ba ang imong orderon kadto ba gihapong pansit molo
o sinugbang talakitok
o mobalik ka ba sa naandang spaghetti
ug greek salad
naglibog siya'g coke ba o sprite o kadtong gisugdan mo nga
san mig light
diin gawasnon kang mopadayag sa imong salikwaot nga pagbati
unya aron mahuman dali mong gibungat

"ikaw nay bahala, kon unsay imo
mao say ako",
gibalikan mo ang hapit mo na masugdi
ang balak nga unta wala
nay kamatayon
alang lang kini nimo
apan
kalit lang namatay ang lampara sa imong agtang
nga gitayhop sa wa pa nimo
maila-ila ug makita nga
hangin
ug tungod niini
bisan pa sa tanang pamuyok kanimo sa kinabuhi
gusto mo na
nga ikaw sama sa balak nga unta walay kamatayon
nga ikaw usab sama sa mga natugaw
ug nawala
unta
mapapas.