mY secreT ponD

adunay panglantaw nga
lantaw lang
ayaw tagai ug utok ang
lubi
kay kana siya kon sutaon
lubi lang kana

ayaw tagai ug baba ang
bato
kay ang bato bisan ug
imong tagaan ug panultion
bato lang gayod
kon ang hangin modapat sa
imong buhok
batia lang kini
ayaw tagai ug pagbati ang
hangin
labyan ka lang niini
mao lang kana ang iyang
mabuhat
kon sugdan mo ug pakanta ang
dagat
mosunod ang mga panganod
ug inig kagabii dili magpalupig
ang bulan ug ang kaliboan kalibo
nga mga bitoon
kadtong naglantaw
walay masabtan kon ngano
nga nahitabo kini
naturalmente samtang sayo pa
samtang wala pa miabot ang
kaguliyang
mas maayo seguro nga
supakan na kining daan
lantawa lang, ayaw na pun-i.