ikaw nga nanawag kanako, pahawa

gitawag mo ako abi kog unsa
imo man lang diay nga gisukod ang
katas-an ang
kabag-on sa akong tingog
diha sa bugnaw nga
kagabhion diin wala ang
buwan ug mga bitoon

unya miingon ka
"kulang, mubo ra" ug sayod ko
bisag di ka pa mosulti sa
imong gitawag nga tinood
nga
wa ka ganahi niini apan

unsa bay ako? kinsa ka ba sa akong
kangitngit
pati gani anino ako mang gipapahawa
aron lang ako
bisan sa makadyot malipay ning
dapita

ako kining tingog. ako lang.
ako ang iro nga mitimbaya sa kabugnaw
og kangitngit
kon mahimo, pahawa sa akong
atubangan.

ang tingog sa kangitngit dili mo masukod
wala kay katungod.
unsa kaha kon ikaw ang akong sukdon
unya kon akong makit-an nga mubo
ako kang inaton? bisan pa ug maputol
ang mubo mong kumagko. nga kon
taas ka ra usab kaayo
magkuha ako ug sundang ug ako
kang pul-ungan.

sa sunod ayaw akog ilara sa imong
pagtawag.
naandan ko na ang pag-inosara ug
kining yabag ko nga awit
nahimo nang higala sa baba sa
kangitngit.