mY secreT ponD

ANG PANGLANTAW NI TORENO SA USA KA WRITER'S WORKSHOP
dili baya lalim ang
nahitabo kaniya

gidapit siya
aron himulbolan
gipahigda siya
aron himbisan
gipapungko siya
isip manok
jolohano
(gipangutana nganong
kusog siya mokaon
ug sagbot
nganong dili buwak
ang iyang kinaon?)
gipahayang isip
usa ka
talakitok
( gidugangan ang pangutana
nga iyang tubagon
nganong naay isda sa
bato
nganong gamay kaayo
kini ug baba
nganong sigi kining gatago
sa mabaw nga
dagat?)
gibulikat ang iyang
mga mata
(kay lantawon ang
nahitabo sa kinagamyang
ugat)
gipabilangkad iyang
paa
(giklaro nila kon ang
samad dapit sa wala
nagpabilin ba ug
ulat nga ang porma
morag tanga?)
giinat ang iyang mga
tudlo ug
gikiskisan ang iyang
mga kuko
(nga mora ba siyag
baboy nga andam nga
ihawon ug ibaligya
sa tiangge sa
tawi-tawi)
wala daw siya kabalo
kon unsa ang
sinultian sa mga manok
unya wala kaayo siya
mabansay unsaon
paglangoy nga
tinood gyod nga isda
didto sa tinood usab
nga dagat
(unsa ba ang kalambigitan
sa tinood ug bakak diha sa
mga dahon? ug unsa ba ang
papel sa mga saba diha
sa mga gasanga-sanga nga
dalan?)
lalom ang dagat
dili matidlom
lapad ug habog ang
langit
ug dili gayod mahawiran
ang mga panganod
dili maputos sa
palad nga
selopin
pagkahuman gipatindog
siya isip tawo isip usa ka
manunulat
giayo ang iyang kwelyo
giinsert ang iyang polo
ug gipataod ang iyang
bakos
ug sapatos
"isul-ob na ang imong
gustong maskara
hiposa ang mga himbis
ug mga balahibo
mao kini ang imong dalhon
pauli sa inyong
bukid ug lapyahan"
maoy ingon sa lalaki nga
niwang nga simag ug mata
ug sa babaye nga pution
unya baga kaayong
antiyohos
gigantihan siya ug usa
ka masaaron nga
pahiyom