sa ilalom sa kalubihan

sa ilalom sa kalubihan
didto ang akong gamay nga payag
nga dugay na nakong gibiyaan

wala na akoy balita kon naunsa na
ang iyang atop
nangalangkat na ba kaha ang mga nipa?
og napalid sa hangin?
o dili ba kaha nangalata na kini tungod
kakusog
og siging ulan sa bukid?

wala pa ba kaha mangahulog
ang mga salog nga kawayan didto sa yuta?
og ang kusina wala pa ba kaha maharag?
og ang banga naughan kay wala na'y tubig?
og unya nahulog ba kaha kini sa silong
kay gabok na kaayo ang banggera
diin siya nako gibutang
kaniadto?

sa ilalom sa kalubihan
mahimo kong malimtan ang akong gamay nga payag
mahimo kong malimtan ang mga bongbong og mga salog
mahimo kong ibalewala ang banga
bisan og kini mabuak na sa pagpasagad
diha sa pagpanglabay na sa panahon

pagkapaspas gayod sa pagtuyok sa mga kamot sa orasan,
morag kagahapon lunes pa lang apan baya
sabado na karon
morag kagahapon enero pa lang
apan karon marso na
og ang mga sagbot sa bukid nagsugod na og pangalaya

ang mga agtang milapad og hapit na nga mosangko sa
duha ka ayuyok
ang mga buhok nanganipis
og ang mga ngipon nangatarog na lang
bisan wala hilabti
panahon na sa pangpanghulog


mahimo kong malimtan ang tanan
didto sa ilalom sa kalubihan
apan ang imong halok kanako
ang imong kataposang gakos
ang atong paghinapos
didto sa ilalom sa kalubihan
niadtong kaadlawon
dili ko gayod kadto mamahimong hikalimtan

itom og puti na lang man gani seguro ang nahibilin
hupas nga bulok na lang usab ang akong maabtan nga naa sa akong panumduman
pan-os na man gani kon handomon sa simhot sa akong ilong
apan, pagkahumot og pagkatam-is lang gayod gihapon