wala ko sugod moingon

sa akong mga kaila
wala ko sugod miingon diha sa among mga panagtagbo
nga ako
nagsulat og mga balak

aduna ako'y kahadlok usahay kon unsay ilang hunahuna
kabahin anang mga balak,

makaulaw kaha, nga ang usa ka dakong pader
magpakatay sa usa ka bagon diha sa iyang kilid og dayon
pagkaugma

manambo ang usa ka pula nga rosa dapit sa iyang abaga
dayon adunay alibangbang nga nagpasaringsaring

aron sudyaan ang mga kabilya kabahin sa pagkatay-an
sa iyang pagkaputhaw?

talawan ang akong mga tiil og ang akong dila
dili makamaong molitok anang kahuyang sa mga pulong:

kabahin sa gugma nga napokan
kabahin sa gugma gitago diri sa ilalom sa bulsa sa akong karsones
kabahin sa paghubo nako diha sa ilang atubangan

makita ko ang panghitabo nga unya mangatawa lang silang tanan
og ila akong biyaan
busa mas maayo nga lahi na lang ang akong hisgotan
kanang ilang naandan kanako

sama sa usa ka lig-on nga pisi
tugas nga salog
walay pinutlan nga haligi
sapatos nga panit sa buaya
bakos nga gikan sa sawa
ngipon nga bulawan
bantok nga salog
dagkong mga bato didto sa pangpang
lapad nga pantalan

kagabii, wala ko maghisgot og balak, ang among gihisgotan
samtang nangahubog na kami mao lang gayod ang kwarta, ang kaulag,
ang bag-ong negosyo, ang koneksyon sa gobernador

og ang bag-ong birhen
didto sa kalye sa mga asul nga alibangbang.