SAYOP NGA PANGUTANA

Mihisgot siya nga ang iyang bugtong anak
Nga lalaki nagkabuang og dagan kay gigukod
Kuno siya sa mga pulis nga wala kaila kaniya
Og miabot ang punto nga ang iyang naabtan
Usa ka
Deadend,
og busa walay nahimo ang maong bata
Og miatubang na lang sa lima ka mga pulis
Nga puros armado og dagko kaayo
Og mga lawas

Gipangutana siya
Pila na’y iyang edad
Igo lang mitungtong sa
19
Gipangutana unsay iyang
Trabaho
Wala
Gipangutana tagadis-a siya
Tagabukid
Sa sitio sa Banbanan
Gipangutana kinsay iyang mama
Si Loleng
Mangomprahay og otan og saging
Og ang iyang papa
Manginhasay sa suba

Gipusposan dayon siya
Sa lubot sa ilang armalite
Gisipasipa sa sinaw nilang boots
Gisagpa
Og sa dihang nalup-og na didto
Sa pader nga sementado
Gibitbit kini nga morag tiki
Paingon sa presinto

For investigation.

Maayong pagkagusbat sa nawong sa
dinakpan
ang iyang mga mata morag hinog nga makopa
nga kahulogon sa sanga

ang iyang mga kamot
nangabali nga morag tikog
sa silhig
Sa maong sibilyan
Naospital og gisumbong pa sa
Mga pulis didto sa
Piskaliya anang


Resisting arrest

Nakapangutana ko kon
Unsa ba diay atraso sa iyang bata
Nganong gigukod man kini sa mga pulis

Mitubag ka
Nga wala. Natripan lang kay ang iyang anak
Niwang man
Nga morag pormag adoy-adoy

Og kining akong tapad mikalit
Og bat-in

“Naunsa man god pod nang bataa
Nganong midagan man?”