puno

sa pagkapuno miawas ka
daw sama sa usa ka baso nga gipuno pag-ayo
sa tubig og kini nausik diha sa lamesa

nakamantsa sa mantil og ikaw nahingangha
limpyohan mo ang mga nangausik
og manda'y alisdan mo pa man gani ang mantil

sama sa kinabuhi nga gisobrahan mo sa pagpuno sa kalipay nangausik kini
og ikaw nahugawan

karon manglimpyo ka sa mga nangausik
naghunahuna nga unta alisdan mo
ang mga tabon sa imong kaugalingon

daghan ang nausik
daghan ang nasayangan
unta imo na lang gipanghatag ang uban
unta imo na lang kining gipaambit
diri kanako