sa mga uhot sa atong kagahapon

didto sa mga uhot sa atong kagahapon
mitago ka
og kadtong akong tinood nga gihigugma

pagkapaspas nga milabay ang panahon
sama sa pagkadugta sa mga uhot
didtong dapita

gibalikan ko kadto kabag-ohay lang
nakita ko ang inyong mga anino
silong sa adlaw nga init pa kaayo
nangatawa gihapon kamo kanako

nganong wala ko ba dayon makita
ikaw og siya
mangingilad ang mga butang nga tataw
sa akong yano kaayong panglantaw

lisod makita ang mga bulok sa pagbati
ang kasingkasing dili gayod dayon motoo
labi na kong kahibalo na kini
sa kasakit sa pagbudhi sa hangin nga
nagsigig hapuhap sa dughan sa bukid

ang taas og lig-on nga kahoy sa lumboy
nagpabilin nga tiunay sa karaan nga yuta
ang tanang dila sa iyang mga buhing dahon
nagpanakla gayod sa ilang subo nga nakita