dinhi sa hataas kaayo nga lugar

dinhing lugara
nipis na kaayo ang hangin
og masihag na nato
ang hulma
sa kalag sa atong
duha ka
kalibotan

aninagon mo ako
nga gikapoy na kaayo
unsa ba ang imong
nakita kanako
nga imo
man akong gisundan
sa kanunay?

gimahal ko ikaw

ang imong mga pangutana
nangapalid daw dahon
nga nangahulog
diha sa ubos sa tiilan sa
kahoy
nga hagbay rang
gipamutlan og gamot
sa panahon
nga walay puangod

sabta ayaw ang
kalalom sa akong
pangagho

masakitan ka lang

hinaut unta nga moabot
na ang mga itom nga
panganod
aron motabon sa mga
luha sa bulan
karong gabhiona

andam na ako
sa paglangoy sa
lawod sa kangitngit
andam na
ako sa lain na usab
nga pagpakaaron-ingon
ning atong
bugnaw nga kagabhion

dinhi sa hataas nga lugar
dili ko na gustong
makita ang
mga hulmigas