ang imong nakita

ang imong nakita mao lamang ang mga sagbot
nga wala na mabunglay

ang mga gagmayng bato nga nagpasad sa daplin
sa kalsada

ang mga bulak sa amorsekos nga andam na pagtapot
sa kang bisan kinsang karsones nga mopasundayag

kuyog diha sa mga tiil nga nahisalaag dinhing dapita
nga pwera buyag haskang gayod nga mingawa

ang imong nakita mao lamang ang kini ang karon ang kana ang kadto
kay ngano
dili na ako magpakatakos nga mangutana pa kanimo

gikan ka na dinhi kagahapon naglubong sa imong mga patay nga hadurawan
og ako nga saksi

wala gayoy katungod sa pagsulti sa ilang mga sugilanon
sa ilang mga ngalan og sa panghitabo didto sa tumoy
sa ilang kataposan

subo nga handumon, oo, tinood, bisan pagkaanindot sa gilak sa sidsid nga giilom

oo, tinood, subo,
subo gayod, og ania ako, gusto untang magpakahilom na lang

apan pasayloa kay ang akong kasingkasing gustong mosyagit sa kapait sa iyang
napang-it, oo, tinood, subo, subo gayod kini nga handomon

ang imong nakita dili lamang ang mga gagmayng bato, ang mga
bulak, ang mga amorseko ang dalan ang sagbot nga wala na
mabunglay