pangagho ang sinugdan
mipaingon
dayon sa usa ka tiaw-tiaw
kihat lang
dayon kuhit
tan-aw og sa kadugayan
naa na ang tinutukay
kanang morag dahon
sa likway nga
nalumoy sa kainit
sa adlaw og pag-abot
sa udto miabot sa
usa ka pagpandong
dayon og hawid sa mga
anino og wala matagbaw
miabot ang pagtapad
og paghapohap
mipadayon sa
pagsalo sa mga pulong
nga tam-is sagol sa
pahiyom og
katawa dayon naa ang
kahilom og pagsaad
sa usa ka
panagtagbo sa bugnaw
og ngitngit nga
lugar aron
haployon ang himaya
nga nahikatulog na unta
nakamata ka sa usa
ka damgo
gusto nimong matulog
og balik apan
gahapdos man ang imong
dughan busa ikaw
milakaw tagbo ang
mga sugilanon sa
imong kahaponon
sa daplin sa baybayon
miasoy ka sa hangin
nagpamati sa imong
pangagho
No comments:
Post a Comment