kaming nangabilin

sa imong pagpakamatay
sa dili saktong panahon
sa imong pagdalidali
nga masulbad ang tanan
sa tumang kasayon

dili ako moiyak bisan og
usa ka lusok sa luha
dinha sa imong lubnganan

kay kon atong sutaon
kaming nangabilin mao
ang naghambin
sa imong mga kapakyasan

kami ang nailad
kami ang magbahad
kami ang giladlad
sa adlaw sa mga saad

ikaw ang mipahulay
kami ang magbudlay