si papa ang nahisgotan usa ka gabii
namong magsoon sa anibersaryo sa iyang kamatayon
sa iyang mga pamolongon kaniadto,
wala sa iyang pamatasan ang pagpanghulam og kwarta
aron lang pagpalami
og pagpanindot sa iyang pamuyo og panimalay
kay mag-unsa man kuno ang nindot nga balay nga inutang
nga bisag walay tulo apan dili siya makatulog
sa pagpangita sa sunod nga kantidad aron iyang ibayad
mas maayo pa kuno
ang nipa nga atop nga bisan og buslot og mosulod ang ulan
apan didto sa ilalom diha sa kawayan nga salog
mahinanok man siya og katulog
puntos na pod sa kalag ni papa
og halad ko kini alang kaniya
No comments:
Post a Comment