ang iyang hulagway didto sa sussex

nagpadala ka ra gayod sa usa ka hulagway
nimo didto sa sussex
lima na ka tuig gikan sa atong kataposang
panagkita
diri sa barangay dos sa katipunan

diha sa bangko naghawid ka sa imong tiyan
ang una mong giburos
tapad ka sa imong bana
samtang siya nagbasa og ikaw
mitan-aw sa kamera nga sa ako pang
ubos nga pagpangagpas
mitan-aw ka kanako nga ania dinhi
nagpanghupaw sa usa ka bungtod
nga pagbasol

ang imong too nga kamot mihawid sa iyang
kamot
morag bagon nga misumpay sa
sanga sa kahoy

lunhaw kaayo ang palibot og nindot kaayo
ang lakaw sa imong adlaw
dinhang dapita

ang tanan nagsudya kanako
nganong gipasagdan ko ang imong pagpalayo kanako

usahay sa mga panahon nga ako maglakaw nga
mag-inosara
samtang nagsipa-sipa ako sa lata diha sa kalsada
mabati nako ang kahiubos sa wala kasabot kanako

kita man gayod untang duha gikan pa sa gagmay
kita na man gayod unta ang bagay
ang angayan kaayong parison
sa ilang panglantaw

kita man gayod untang duha
unta, unta, unta

apan unta
inyong sabton

unsa ba ang akong ikahatag nga kaugmaon sa ato
unyang mga umaabot?

makaon ba ang mga pasalig sa akong mga balak?

sa tinood lang sultihan ko ikaw
og usbon ko ang akong gisugid diha kanimo samtang ikaw nagbakho
atubangan kanako nga mitutok kanimo og naghaploy sa imong
aping

kay ako tinood mang nahigugma kanimo
gikalipay ko pag-ayo ang imong kalipay diha sa iyang kiliran
diha sa lugar nga lunhaw
layo kaayo kanako

gilubong ko na ang mga patay nga dahon diha sa atong nataran
gikalipay ko pag-ayo ang pagpamusyak sa mga bag-ong tubo nga sagbot
dinhi sulod sa akong kasingkasing
nga karon mitabon sa akong gauga nga mga hunahuna
kamao akong makalimot
bisan kon dugay
pa mapapas ang mga napatik nga mga handurawan

wala ako malisang anang mga kagoul
og kasakit
naanad na ako niana sama sa akong pag-anad anad
sa samad sa akong kasingkasing
sa pagdumboldumbol sa akong dughan
nga hagbay rang nalupyak
naguba nahapla
nabungkag

ayaw kabalaka
master na nako ang pagsipasipa sa lata
gahi na kaayo ang tumoy sa akong karaang sapatos.....

salamat diay sa imong gipadala nga larawan