kasal

nindot ang ilang kasal
puno sa bisita og ang pagkaon nagbaha
nagpasad ang litson
og ang mga putahe nag-alili pirme

naglantaw ko
dili kaayo angayan ang babaye
og ang lalake sa tinood nga pagkasulti
ambongan
barogan

daghan ang miiyak nga iyang gibiyaan
samtang siya gikasal
og dunay mibakho
sa dihang nabungat na ang mga
"i do, i do"

pagkamalipayon sa babaye
ang iyang katawa lapos sa iyang duha ka aping
og apapangig

pagkahuman sa kaon
og sa dihang nanguli
na ang mga bisita
nanulod na sila sa lawak
sa balay sa babaye
nga bugtong anak sa usa ka dato
nga magtiayon didtong lugara

naghubo ang lalake
og ang babaye naghubo na usab
nga nagtagad kaniya
didto sa katre

kon imo lang untang masulod
ang hunahuna sa lalaki
mao kini:

(natuman na ang akong damgo
dato na gayod ako karon
og dili na ako biay-biayon!

mitapad siya sa babaye
gihagkan ang ngabil
og mipiyong sa iyang mata
og mibungat)

gimahal ko ikaw

(apil na ang imong kalubihan,
basakan,
katubhan,
ang mga baka,
ang pasto,
ang awto,
ang kwarta,
tanan nga imoha
ako na usab kana!)

gimahal ko ikaw

(natuman na
ang iyang pangandoy!
langaw siya
nga karon nahimo ra
gayong kabaw!)