mga pangutana

sumala sa imong nakita kay didto ka man kaha gayod
sultihi lang ako sa tinood
kabahin sa maong bata nga usa lamang ka animo
sumala sa imong sugid

unsa ba?
gitunol ba niya ang iyang kasingkasing
sa mga kamot sa kawanangan?

gisaknit ba kini gikan
sa iyang gagmay pa kaayong mga tudlo?

unsa ba gayod ang tinood?
sultihi ko?
aduna bay pagpugos

o ang bata ba mismo ang mitunol niini
aron mawagtang ang tanan
nga sakit diha kaniya sa iyang panit

kay sugod pa lang sa iyang pag-abot
sa dihang mitan-aw siya sa palibot
dili na niya gusto pa nga mopuyo og dugay dinhing dapita.

sultihi ko palihog kon asa na ang bata
karong adlawa
pangitaon ko gayod siya bisan
pa sa tungatunga sa kalasangan
sa imong mga pagpamakak.