kanus-a pa kaha?

mibalik ako sa lawak nga dulom
ania pa kanako ang yawe sa kangitngit
og giablihan ko ang pultahan sa usa
ka dakong sala

wala ka na didto apan nagpabilin
ang usa ka kahomot sa handurawan
kadtong akong gisul-ob sa imong liog
nga mga perlas
nga luha

wala pa nako pil-a ang mga habol sa
kagahapon
wala pa nako malukot ang mga banig
sa atong mga damgo
giwahing ko ang kurtina nga nagtabon
sa baba sa usa ka bintana
aron makita ang usa ka ugma
nga nag-ung-ong
og nakita nako ang dila nga
sa gihapon nagpanilap
sa kahinam

adunay lama sa atong paglompong
nauga diha sa salog sa mga pagbati
gisulayan ko kini usab sa paghikap
akong gisimhot og akong gitilapan
nakapangagho ko sa usa ka lalom
kaayo nga dagat

kanus-a pa kaha? kanus-a pa kaha
mobalik ang mga panahon diha sa
naulahi nga pagbasol