Wednesday, March 18, 2009

DILI KO MOLAKAW




Wala nako hunahunaa ang paglakaw
daghan pa ako og gihandom dinhing dapita

sama sa kaputi og kahumot sa siopaw
diha sa istante sa inyong tindahan
ang kaugdo og kahumok niini
ang kalami nga unod sa karneng baka
nga maoy gihimong palaman

nga gilat-an pag-ayo nga
nag-paabot sa akong pagpang-it
sa iyang kalamian

Wala miabot sa akong kinabuhi
ang paglakaw kay ang akong mga tiil
dili makabuot kanako
ang akong baba nangasaba og ang dila sa akong
kasingkasing nagkiglalis sa akong mga
kumagko
aduna kini gusto nga buhaton
aduna kini gustong ibutyag
diha sa mga hardin sa bulak
sa cebu normal university

daghan ang miabot nga mga panganod
sa nataran sa akong kawanangan
og ang kahayag wala pa gayod mobuswak
aron bugawon ang kangitngit og kahanap
nga gitabonan sa mga abog sa ginhawan
sa mga tambutso sa jeep diha sa colon
og sa jones

gusto nakong ipadayag ang akong
mga gitipigan
kuhaon na nako ang tabon sa akong
uluhan ang tapis sa akong dalunggan
ang mga medyas sa akong sapatos
ang panyo nga akong gitabil sa akong agtang

mao kini ang tinood
wala diay mahigugma ang adlaw sa bulan
wala diay mahigugma ang sapa sa mga suba
nga karon nagpaingon na sa kadagatan

mao kini ang tinood
mas lami pa ang siopaw kaysa imong aping
mas humot pa ang bulhot sactambutso kaysa imong dughan
mag hapsay pa ang abog sa jones kaysa imong pamanit

oo, dili ako molakaw
kay kapoy kana kaayo
labi na nga layo pa kaayo ang akong adtoan
mapudpod unya ang akong mga lapalapa


mosakay kog taxi day!

No comments: