wala ko maanad anang paglingkod sa kilid
sa bintana og magpunay og hangad kon kanus-a
mosubang ang bulan
kapoy na kana kaayo
wala ko sugod mabuhat nga kon ako mahiubos
matago ko sa ilalom sa lamesa og dayon
og ihap sa akong mga kumagko
kapoy na kaayo kana
kamao kong molingaw sa akong kaugalingon inday
kanang pagtigom og mga sihi
kanang pag-abis sa yuta aron mabati sa akong sanggot
ang mga tuway
tapad sa kanipaan
trabaho ko kana
kanang pagpaabot diha sa daplin sa suba
tungtong sa lubi nga natumba sumpay sa pikas tampi
kanang pagtugway sa akong pasol
aron pagtintal sa mga puyo nga mokobit sa akong
mga paon
kabisado ko na kana kaayo
ayaw ako suraha sa akong pag-inosara nianing
akong pagpakahinog sa ngitngit nga agianan
kabalo kong molipay sa akong kaugalingon
kitik sa akong gigkanan
sayod ako niana
kadyot lang og dayon nako og biya
mao na kana ang akong naandan
bisag magkita pa kita og otro
walay basolay walay hawiran walay hung-abay.
No comments:
Post a Comment