ania ka na usab
mibalak sa dili na maihap nga
ikapilang gugma
misulod ka sa usa ka lawak
nga daghan kaayong tawo
og duna kay nakita
lahi sa tanan
mata lang gani unta
apan naunsa ba nga mikalit
man lang og undang
ang pagtuyok sa kalibotan
og morag ikaw og siya
na lang man dayon
nga nagtinan-away
nga dugay
mipahiyom ka
og mipahiyom usab siya
og mituyok na pagbalik
ang kalibotan
miabot ang mga alibangbang
ang mga asul kaayo nga
panganod ang init nga adlaw
ang bugnaw nga huyohoy sa
hangin gikan sa
kadagatan
didto sa sulod sa maong
lawak og sa dihang nagdug-ol
na ang inyong mga lawas
og nasangkilan nimo ang
iyang kamot
dili na nimo gusto nga
molakaw pa ang mga oras
sa imong mga lapalapa
daw nabati nimo
ang gilok sa kahangtoran
No comments:
Post a Comment