pagpaabot

lahi ang imong pagpaabot
ang kalaay sa imong
bra
naghisgot og usa ka sugilanon
mahitungod
sa usa ka magtiayon didto sa
bungtod
nga wala na magmalipayon

wala nimo hisgoti ang ngalan
sa lalaki
apan ang ngalan sa maong babaye
imong gisulat
sa usa ka papel nga putos sa usa
ka sigarilyo
sa marlboro og ikaw nagpadungogdungog
nianang imong
pahiyom nga akong nasabtan

giyam-iran nimo ang akong
gipanghambog nga
katuigan

sa imong puti nga paa ang kahayag
sa bombilya
morag dila sa usa ka iro nga gutom
kaayo og
nagpanilap gikan sa imong
lapa-lapa paingon sa tunga-tunga
sa imong bilahan

ang bintana gustong manirado
og ang pultahan
mibukaka og miwahing
sa katunga sa iyang panagway

andam na ang tanan
diha sa usa ka pagpaabot
nagsinaw ang pagkaasul sa
sofa diin ikaw mihay-ad

ang imong kamot
gipahuraray dapit sa imong
sampot nga bus-ok

ang mga tudlo nagsulti
sa lugar diin asa ka paingon

ang pagpaabot usahay
mas lami kaysa sa pag-abot

ang sugilanon sa usa ka magtiayon
didto sa bungtod
nga wala na magmalipayon
karong gabii
ato na gayod nga taposon