kabahin nianang paglamba sa pultahan

gipili nako ang dili gayod pagpasakit
busa wala nako sugod tun-i ang paglamba sa pultahan
aron adunay makuratan og masakitan

dili nako pamatasan ang pagpalupad anang mga
ispiritu
og busa kabahin niaanang pagpanglamba sa pultahan
og pagpanirado sa hingpit anang mga ganghaan

ang akong mahimo mao na lamang ang pagpaabot
kay sa tinood
gihandom ko usab kini apan sa usa ka kondisyon
nga lain ang mohimo niini

sama nimo karon
nanirado ka sa pultahan og sa mga bintana nga pati ang hangin
gikan sa mga kakahoyan dili nimo gani pasudlon
miginhawa ka sa usa ka pangagho
og imo usab nga gipilot ang imong mga ngabil

og ako
sama sa usa ka marinero kunuhay nanuktok sa mga pultahan sa dagat
aron unta imong abrihan sud nianang lawod nga kahilom
og kunuhay ako usab mibakho sama sa mga balod og ikaw nagpatigkong
diha sulod sa imong mga baybayon

kon nasayod ka pa lang unta
nga ang akong baroto andam na sa usa ka paggikan
palayo niining atong isla sa mga pagmahay og kasakit

usa ka tulganan na lang
og ugma sa sayo sa kaadlawon dili mo na gayod makita ang adlaw
dili mo na madungog ang mga tuktok sa mga bongbong sa hangin

og dili mo na madungog ang usa ka malipayon nga awit sa usa ka tamsi
didto sa halayong isla kuyog sa usa ka matahom kaayo nga
anino sa usa ka bag-ong mitubo nga bulak

pula kaayo nga rosa alang lang kini kanako