ang sulog sa mga bulok

ang sulog sa mga bulok
nahisama sa tubig og lana
gusto ko kini
apan lahi usab ang akong gibuhat
dili ko kini gustong buhaton
apan unsang pagkaitoka
nga mao na man hinoon ang nahitabo
mora bag wala kita
og bisan ako lang sa akong kaugalingon
mora ka og nahikatulog o nawad-an ba kaha sa panimoot
og sa kalit lang sa kalit lang gayod
anaa ka na didto
og siya usab nagpauraray na kanimo
naalimungawan ka lang
sa tumang kalipay
dili unta angay
apan ania nahinanok
ka sa iyang kilid
og siya usab nagpiyong sa iyang mga mata
og naghandom nga unta kining higayona
dili na matapos pa
apan unsang hitaboa
daw sama sa usa ka damgo
takulahaw lang nga nawagtang
ang tanan
og daw sa dili ka makatoo
anaa ka na usab sa laing dughan
nahikatulog sa tumang kalami
og kakapoy
og nakapangutana ka
asa ba ako?
kinsa ka ba?
og unsa ba ang nahitabo dinhi?

sa sulog sa mga bulok
diha sa pula, sa puti, sa ilang pakigharong sa amarillo,
sa lunhaw sa asul
sa mga abohon
nga bulok sama
sa lana og tubig
sama sa atong mga pagbati
pangutan-on taka

nakasabot ka ba niining tanan?

niining pagtuyok-tuyok
sa mga lingin?