marcus

mitutok ka kanako
sa dihang ikaw miinom
nianang usa ka baso
nga puno sa bugnaw
kaayo nga tubig

nahupay ang imong
kauhaw og dayon og
balik nimo sa gawas
arong ka magdula

mao kana ang imong
kalibotan og gikan na
usab ako dinha

sa akong kalibotan
marcus
lahi na ang tanan

adunay kauhaw sud
sa akong dughan
nga dili mahupay sa
tubig

adunay dula nga dili
na diha sa maong
nataran

lahi kini
mas lalom ang kasakit
mas tig-a ang kasingkasing
apan marcus sultihan ta ka
kon matungnan
mas lami usab ang kalipay

ikapitong langit
ang katas-on sa akong
pagbayaw

kinalawmang dagat usab
ang akong pagtiglom
og didto nako dawaton
ang akong kamatayon

marcus, marcus
inom una sa tubig nga
sa kauhaw karon kanimo
makatagbaw

bata ka pa marcus
og dili ka pa makasabot
sa akong kaligotgot