ayaw kasuko

ayaw kasuko higala
mao kana ang hinungdan kon nganong mikunot ang agtang sa kalibotan

panamin tan-awa ang imong aping
pagkahamis unta kon imo kanang gihidhiran sa duga sa kalipay

hibaw-i nga kon maghambin ka og kasuko
managhan ang halas diha sa imong ulo
mao kana ang imo untang mga buhok

ayaw kapungot higala kay ang mapungot mao baya ang mag-ugot
wala kanako ang pag-unsa
kay igo lang akong nanglimpyo sa imong nataran

bisan wala nimo ako sugoa og mangutana ka kon ngano?
tungod kay gimahal higala

sa kabukiran ang tanang mga kalanggaman

tungod kay ang dagat nag-amuma man sa mga isda diha sa iyang tiyan
tungod kay ang mga sagbot nagmahal man sa yuta
busa iya kining gitabonan

tungod kay ang adlaw mosilang man
aron paghungit sa mga pagkaon alang sa mga dahon
tungod kay ang mga suba
gimingaw man sa kaasul og kahilom sa lalom nga lawod sa dagat

tungod kay ang mga bangaw
maghimo man gayod og mga taytayan sa mga tiil sa bungtod
tungod kay ang mga gangis
moawit man gayod sa kamingaw didto sa kagulangan

tungod kay ang ulan
mopatagbaw man gayod sa kauhaw sa mga baba sa kabulakan
tungod kay ang hangin
mopahupay man gayod sa kaigang nga gibati sa mga bato sa dalan

tungod kay ang mga alindanaw
mangita man gayod og sanga nga ilang kabatogan
tungod kay ang mga tikarol
manilip man gayod sa haloan nga ilang madagit

tungod kay ang mga ulod
mangita man gayod sa mga dahon nga ilang masimasima
tungod kay ang bulan mopanaw man gayod sa suba nga mga panganod

tungod kay ang mga panganod
maglutawlutaw man gayod sa kawanangan
tungod kay ang mga bitoon
mogilak man gayod sa kangitngit sa kagabhion

tungod niining tanan, ania usab ako magyamayama
diha kanimo
tungod kay ikaw anaa namati usab kanako

kay ugma puhon kon wala na ako dinhi
mangita ka unya kanako
apan dili mo na madungog
ang akong mga panghayhay tungod kay ako gidagit
na sa mga kamot sa tumang kahayag.