sigarilyo

unsaon ba nimo paghigugma ang hangin?
ang aso
sa mga kalayo nga kadyot lang kaayong mihatag kanimo sa kainit
nga atong gisaloan
kagabii?
sulod sa imong lawak imo akong hinumduman
sa laing hulagway
kanang imong akong kasilagan
usa ka nilalang
nga nagpunay og panigarilyo,
usa ka aso
nga motuok sa imong liog
nga ikaw gustong
kuhaan sa ginhawa sa imong kinabuhi,
nawong nga nagtago sa kangitngit sa iyang takuban,
dili na kini molantaw kanimo,
molakaw na kini sa halayong dapit,
ayaw na kini siya sunda
sa iyang mingaw kaayo nga panaw,
palihug ayaw, bisan sa mga damgo,
kasilagi ako,
dili ako makahatag kanimo og kinabuhi,
wala na ang akong lawas
nga molipay nimo sulod sa imong mga damgo matag gabii,
wala na, bisan og usa ka dahon lamang,
silhigi ang mga upos,
ayaw na ako hinumdumi diha sa gidagkotan mo nga sigarilyo.