tul-id

i

dayag kaayo ang atong padulngan
usa ka balay nga tapad sa
puti kaayong panganod
nga misandig
sa tumoy sa usa ka
bungtod
diin misalop
ang adlaw og

tataw na ang
pagpangamang sa
mga kuyamoy sa
kangitngit
sa kilid sa aping
sa Antulanga

diyes sentabos na
lang ang kulang
paingon sa langit
matod pa ni Nanay

nganong nagpaliko-liko
pa man kita
paingon didto?

gipangutana ko ikaw

og mitubag ka kanako
nga kon atong tul-iron
titip ra kaayo
og ikaw nga naanad
sa kayahay niaanang
mga kahayag sa
patag nianang
mga tataw
sa balason nga yuta

basin og hangakon ka pag-ayo
og dili unya makaantos
sa kalapoy ang imong mga lakang
niiining habog kaayong
bukid nga
atong pagasakaon

basin unya og kini na hinoon
lamang ang makapahunong
sa imong mga tunob


ii

dili gayod masayon ang
pagpangita nianang mga bulawan
sa hunahuna

sakaon kini og kadtong
miunong og matinod-anon
bulahan kay
molungtad og makakat-on

mosugakod sama sa mga
bato og mga
balagon
nga mihawid sa
mga bukton nianang
daghan mga
titip kaayong pangpang.