pangitaon ka nako sa akong mga bukton

pagbalik nako wala ko una miadto sa inyo
wala na makaila kanako ang inyong nataran

dugay na kaayo og ang mga saging nga atong
gipansilongan kaniadto nangamatay na man gani

milabay lang ako sa inyong labat nga naalisdan na
sa una kawayan lang karon sementado na og

habog man gani kaayo, og ang inyong iro nga si
jaguar patay na usab og ang imong iring nga si

kitkit namatay na man diay kuno nakakaon og
bagtok nga makahilo. Pagkapaspas gayod diay

managan ang mga kamot sa atong mga orasan.
ania ako karon mibalik sa akong mga agi aron

paghandom sa atong mga nahimo didto sa daplin
sa sapa nanglantaw ta sa mga puti nga mga pato

nga nagsiging lutawlutaw nga morag mga styrofoam.
si manong kasyo, kadtong akong barbero nga

naghatod sa akong mga sulat kanimo kaniadto
namatay na man diay usab. Wala gayod ako

masayod hangtod nga mihapit ako karon didto
sa iyang barberohan kay unta magpaalot sa

akong mga buhok nga haskang tag-asa na.
Lain na ang tag-iya sa iyang barberohan og

gilamogan na kini nilag mga bayot nga dili
lang mokorte og buhok apan apil na ang

manicure og pedicure. Si Sally ang kabit ni
Manong Kasyo naminyo ra gayod diay ni Eddie.

Nagminyo og otro is Manang Karya sa usa ka
batan-on nga bosero didto sa Bukana og

nakaanak silag usa. Si Manong Kasyo diay ang
dunay diperensya. Si Mario nga nanguyab nimo

nga wala gani nimo sugta, kay lagi uyab na man
kita namangkoy diay, og giswerte sa iyang negosyo

anang pagpangompra og scrap iron. Nagkita mi
ganiha sa merkado kay mipalit ko og atay sa

baboy kay sayod ka paborito gayod nako ang
inatayan. Ikaw man gani ang magpahatod nako

didto sa among balay. Misuroy ko kadyot sa plaza.
Duna na diay treehouse, og ang estatowa ni rizal

gitaparan na sa estatowa ni andres bonifacio.
Nagkomedya ko nimo sa una nga si rizal walay

tuli. Si Bining nga imong amiga naminyo ra gyod
ni Aguido nga kontra man unta kaayo sa iyang

Papa nga si Nong Tarsing. Nakaanak silag usa og
ilang ginganlan og Juliet, anggid anggid nimo ang

bata nga pagkaputi ra ba. Grade six na. Bright ra
ba kuno kaayong bataa. Nag-ingon si Bining nako

nga dugay ka na diay nga milarga sa Austria, naminyo
man diay kuno ikaw og usa ka Gomolka, kadtong

computer engineer nga imong giingon nga nahimo
nimong penpal. Wala na ko sa dihang naghisgot ka

sa imong sulat na lang. Wa na man gayod ikaw nag-
sulat kanako, kay wala man god ako usab nagsulat

kanimo. Walay klaro ang atong panagbulag. Og ang
akong mga bukton nangita pa gihapon sa imoha.

Sayang, kon kanus-a mawala ang tawo, ayha pa man
diay niya matugkad nga siya imong gihigugma.