nag-inosara nga bulak sud sa lasang

nag-inosara nga bulak sud sa lasang sud sa kagabhion
mobuswak ka
mangalimyon ka sa kahomot
apan wala gayoy makasimhot kanimo
mopasiga ka sa imong mga gihay sama sa bulan,
mopagilakgilak ka sama sa mga aninipot
apan wala gayoy makakita kanimo
wala gayoy makabantay sa imong kaanyag
kay sa ilang pagpangatulog
mao man usab ang imong pagpamulak

ang mga kwaknit og mga pungak
ang mga ulipon sa kagabhion nagtinukubay
sa ilang mga kaugalingon
og ikaw anaa gilabyan lang nila

ako nga nawala dinhing dapita
nalooy gayod kanimo, sulaton ko ikaw
sa usa ka balak, halad ko kanimo kay
sa hamubong panahon sa imong pagbuswak
niining kangitngit sa kagabhion, ugma sayo
sa buntag malaya ka na usab, og walay
ni usa kanila ang makapanugilon kabahin
sa usa ka maanyag nga bulak nga
mibuswak og dayon nawagtang lang dayon
sama sa mga pagbakho sa mga
hungaw kaayong pagmahay
sa mga tawong kalit lang nangamatay.