sa pagkahibalo nakong
wala gayod molungtad ang
imong gugma diha kaniya
og nga ikaw karon
anaa na usab milanding
sa laing mga kamot og dughan
nasubo ako sa una nakong pagkadungog
sa lain na usab nga gugmang
napusoy napakyas nabalintuwang napasgang
apan sa laing bahin ako usab
baya nalipay
ingnon tang gamay
kay ako wala na mag-inosara
sa pagdawat niining
mga gugmang napusgay, nabara
nakimpang napiang
kasing-kasing nga nagisi
napulpog nabugbog nalimogmog
og sama sa barkong ilang gibiyaan
wala akoy mahimo kon dili
pagdunggo na lang sa laing pantalan
og sama sa mga banang gisirad-an
sa mga asawang kunohay
gibubhian
wala na akoy mahimo pa
gawas na lamang sa pagtuktok sa laing pultahan
ayayay! dili tawon ko gustong mamatay lang
nianang walay pulos og walay hinungdan
gugmang pan-os, gugmang gigamos, gugmang pinugngan, ayayay! di ko kabalos
kay ang akong gugma Barbara, gugma kining gauros-uros nga mora og siplit sa tulos.
No comments:
Post a Comment