akong tambag sa ngalan sa imong anak unya

kaanindot hunahunaon nga manganak ka diay
usab og babaye paris sa imong anak nga lalaki
og sa pung mo pa hingpit na ang usa ka parisan.
akong ipakita nimo nga nasina ko, busa ako motambag
ayaw nganli og charity, kay morag sweepstakes
ayaw og hope kay ngalan na kana sa usa ka sigarilyo
ayaw anang sunny, kay morag itlog nga pinirito,
(sunny side up sir? or scrambled? or hard boiled?)
ayaw lang pod nang ebony, kay itom man na, looy
sab ang imong bata, nga ihandig unya sa alkitran.
morag angayan og Beauty, pero basin makadaot
sa iyang igsoon nga lalaki, mahimong Beast, di ba?
naay nindot nga ngalan, kanang ilamog ang inyong
ngalan: Hazete, Tinglen, Lente, Hazellete, Vicenta,
Vicentita, Juliet, Jullete, Hazlet, Vichaz, Hazvic,

pero motuo lang kos tambag sa among lola nga
pagkareligiosa, tan-awa na lang ang almanake.

kon matunong nga ang iyang ngalan Ignacia,
Felicissima, Dolorosa, Eufemia, Paciencia,
Tortusa, Ricarda, Rica, Magnesia, Edilberta.

unsaon na lang? bitaw, Beauty na lang. Liwat
man kaha nimo? (ha ha ha, maayong pagpanganak)